ASPERANZA RONDADORA

Dizir ronda yera dizir fiesta, ulor á albaca, sabor á lamíns y á chen. Pero si rondan os de Boltaña, antimás d´ixo ye una postema d´alegría que se estendilla por do pasan, una pasa d´argüello por o nuestro país, una malotia que nos apegan con cada garganchón que esclata en pirols de parolas de dignidad. O esprito d´os almogabars torna a bolar con as notas de gaitas, guitarras, trompas y curdions. Biellos dioses y guerrillers que fendo bezinal, andan escoscando los campos de tanta balluaca, con una nueba simién d´asperanza. Tres discos y cuasi cuatrozientas autuazións de punta á coda de o país, siñalando con a boz os mals d´ista tierra aragonesa: palomas que chuntas no sapen esbolastriar, nazión que no dixan caminar, entibos en os que naufragan tantas casas espaldadas, luengas moredizas que dixamos amortar. Dizir Ronda de Boltaña ye dizir debantar os güellos y enrestir con rasmia o esdebenidero, ye un rechito en l´arbol biello que belunos ya quereban cremar, ye a boz d´un pueblo que dispierta. Muita responsabilidá ta chens rozeras y buenas. Chen de o pueblo que li cuaca arredolar-se d´amigos y de querenzia. Chens senzillas que aman a suya tierra. Chen bogal que menestamos lebar dintro de toz nusatros.

Zésar Biec Arbués.
-"Sin amerar"_
"Siete de Aragón"
nº 346 22-28/Oct/2001