LA RONDA DE BOLTAÑA
L´estíu pasau plegoron dica os nuestros uídos, cuasi de sopetón (muitos no sabébanos cosa de o quefer d´ista Ronda) un ramullo de cantas que mos trucaron con rasmia o ficazio por a suya calidá.
Se trataba de o primer disco de La Ronda de Boltaña. Disco muito cudiau en toz os suyos aspeutos: portalada, letras de as cantas, ideyario de a Ronda y esplicazións de o esprito y desembolique de as piezas.
De os deziseis temas de o triballo, toz bien acotraziaus, cuatro son piezas populars de o Sobrarbe, os atros son de nueba creyazión. Cal fer onra a ras dos grabazión en aragonés sobrarbés: Niña bonita y O viento rondador, as atrás güeito piezas cantadas son en castellano.
Ta fer-nos una ideya de o esprito que reboza o disco emos triau unas linias de o testo que amaneze en o cuadernet: .....sin xuplidar nunca ras cantas y mosicas populars que constituyen l´alma de o que femos, emos íu dixando un güequet en as rondas ta una serie de cantas que, en iste país tan silenzioso, preban de charrar y de que charremos y de que se charre de as nuestras cosas, de a nuestra chen y os nuestros lugars".
Y asinas de as cantas brincan os entibos totons, os eroes populars, a fiesta, o pasau y l´esdebenidero, Boltaña y Sobrarbe entero.
Escuitar o disco ye una traza de biachear ta Sobrarbe, de prexinar paisaches, de embolicar-te en sensazións, ye una traza de recullir os sentimientos que esbotan d´unos corazons, os de os mosicos, enronaus de querenzia por o suyo país.
No dixez de sentir-lo
Chulian Segura
Diario del Altoaragón
26-Junio-1.997